Palasport Benedetti, publicât il bant pe concession

La aministrazion comunâl e à publicât un bant par afidâ la gjestion e l’ûs dal palasport Benedetti. Al bant a puedin partecipâ societâts, associazions sportivis diletantistichis, ents di promozion sportive e federazions sportivis leadis ai sports che si puedin praticâ intal implant, ven a dî basket, volley, judo, pesistiche e boxe. Cui che al è interessât al à di presentâ, dentri di misdì e un cuart (12.15) dai 26 di Avost, une propueste che e vedi dentri la ufierte economiche, un progjet di gjestion e un plan dai intervents par miorâ l’implant. Si à ancje di proponi la durade de concession, che e à di lâ di un minim di 9 a di un massim di 15 agns. Lis domandis a saran viertis intant di un incuintri public in program ai 27 di Avost (15.30) in Comun. Il stampon di convenzion pe concession dal complès sportîf, intune cul bant, si ju cjate sul sît internet dal Comun (www.comune.udine.it) e su la tabele pretorie che si cjate in rêt.