Lâ fûr citât in taxi al costarà il 13% in mancul

Lâ in taxi di Udin fûr citât al costarà il 13% in mancul. Cun di fat, la Zonte comunâl, su propueste dal assessôr pes ativitâts produtivis Alessandro Venanzi, e à fate buine la propueste dal CAPU, il Consorzi dai taxiscj de citât, di sbassâ la tarife extraurbane dai taxi, in maniere di dâ une man ai utents che a doprin chest mieç par spostâsi intai comuns dongje o in direzion dal aeropuart o di cualchi localitât turistiche. Il presit par chestis tratis al larà jù cussì a 0,87 euros par chilometri, ven a dî sui nivei che si veve intal 2011. “Cheste – al à spiegât Venanzi – e je la prime di une serie di colaborazions che a podaressin cjapâ vite plui indenant cul CAPU, colaborazions che a podaressin puartâ a slargjâ i sconts su lis tarifis ancje su lis tratis urbanis, magari in ocasion dai grancj events che a interessin la citât tant che la Gnot Blancje o Friuli Doc”. Lis tarifis dai taxi par leç a àn di jessi concuardadis des societâts e des aministrazions comunâls. “Il nestri obietîf – al à zontât l’assessôr – al è però chel di sburtâ par un cambiament di mentalitât che nus puarti sul nivel di altris citâts europeanis dulà che l’ûs dal mieç public e dal taxi al è cuotidian e economic”.