Presentazion aes associazions de “Agjenzie de famee”

Vuê si à la presentazion ai citadins e aes associazions de “Agjenzie de famee” dal Comun di Udin: un progjet che al ponte a superâ il welfare assistenziâl par imbastî une rêt ative cul teritori pai jutoris, sei economics sei in servizis, aes fameis. L’obietîf dal progjet al è chel di miorâ la cualitât dai intervents publics e privâts cun formis di integrazion e di coordenament, e di imbastî rêts e aleancis tra i diviers sogjets dal teritori. La conference di presentazion si ten in sale Ajace a sîs sot sere cui intervents dal sindic Furio Honsell, dal assessôr pai servizis sociâi Antonio Corrias, de responsabile dal servizi sociâl dai Comuns dal Ambit dal Udinês Maria Teresa Agosti, dal diretôr dal dipartiment comunâl pai servizis ae persone e ae comunitât Filippo Toscano, dal president dal “Forum associazioni familiari Fvg” Giancarlo Biasoni, e dal vicediretôr de Caritas diocesane Paolo Zenarolla. Pe ocasion e sarà dade fûr aes passe 80 associazions cjapadis dentri intal progjet la gnove vuide metude adun dal Comun sui diviers servizis pe famee che a son sparniçâts sul teritori.