Presentadis lis ultimis novitâts pal traspuart public locâl

Un traspuart public simpri plui “inteligjent” in stât di doprâ lis gnovis tecnologjiis par svicinâ e rispuindi aes dibisugnis dai citadins. Al è chest, in struc, il sens de iniziative svilupade de SAF in cunvigne cul Comun e presentade ai 8 di Lui dal sindic Furio Honsell, compagnât dai assessôrs Enrico Pizza e Gabriele Giacomini, dal vicepresident de Provincie Franco Mattiussi, dal aministradôr delegât de SAF Gino Zottis e dal diretôr de SAF Paolo Zaramella. Cuâi i servizis gnûfs presentâts? Si tache cun Transit su Google maps, che al permet a cui che si môf di planificâ i spostaments doprant dome i mieçs publics cun informazions su oraris, fermadis e timps di viaç. Al è po Qrcode, il codiç identificatîf des fermadis che une volte cjapât cul iPhone al permet di cognossi i oraris dai bus e la ore juste dal prossim passaç. Un altri servizi al è chel dal UpMobile, la aplicazion pal paiament dai biliets alì de fermade cul smartphone. Tra lis novitâts al è però ancje il DST (driving style tutor) che al permet di stâi daûr al autist par miorâ la sô azion di vuide in maniere di limitâ i consums di carburant, sbassâ lis emissions in atmosfere e incressi il nivel di sigurece dal sisteme.