Udin in Europa League, i compliments di Honsell

Par dute la citât al è di ce jessi braurôs par vê rivât a otignî ancjemò une volte un risultât cussì impuartant; chê de Europe e je une vetrine straordenarie par Udin che cu la sô scuadre di balon si fâs cognossi ancje a nivel turistic e culturâl ator pal continent. Cun chestis peraulis il sindic Furio Honsell al à comentât il sucès dal Udin inte ultime zornade dal campionât di balon di serie A che i à permetût di centrâ la cuinte posizion in classifiche e al à tornât a puartâ la formazion furlane intune cope europeane. Intal indreçâ i siei compliments ae scuadre e ae societât di balon furlane, il prin citadin ju à invidâts ducj a palaç D’Aronco par un incuintri cui conseîrs comunâi.