Infuartide la linie 7 cun fermadis fin a Beivârs

Il Comun e la Saf a àn concuardât che lis vot corsis des domeniis dilunc de linie 7 inviadis cualchi setemane indaûr a restaran in vore e a saran infuartidis cul slungjâ il percors fin a Beivârs. L’intervent al jere stât pensât par rispuindi ai vueits causâts dai tais al traspuart public locâl cu la leç finanziarie regjonâl pal 2013 e al interessave la aree di Godie, il simitieri di Padier, Cjavriis, l’ospedâl e vie Culugne. Cun domenie ai 28 di Avrîl la linie 7 e zonte cussì altris dôs fermadis, une ine vie Emilie e chê altre in vie Bariglarie. La operazion e je pussibile in gracie dai 146 mil euros che il Comun al à metût in bande cun sparagns intal Plan urban de mobilitât e cun altris risorsis che al veve a disposizion. Chescj fonts a permetaran ancje di lâ indenant cul servizi di bus navete pal cjastiel e di eliminâ des bariduris architetonichis su cinc ponts de linie 1.