“Far sport – Oltre la crisi”, 524 lis domandis rivadis

A son 524 lis domandis di contribût rivadis in Comun par vê acès ai fonts dal progjet “Far sport – Oltre la crisi”, la iniziative dal assessorât pal sport che e vûl judâ lis fameis in dificoltât cu lis spesis par iscrivi i fruts a di une ativitât sportive. Cuasi dutis, ven a dî 479, a son stadis fatis buinis e si dividaran i 57 mil euros metûts a disposizion dal Comun, di Amga Energia&Servizi e de Casse di Sparagn dal Friûl – VJ. Il contribût al cuvierzarà il 50% de spese, e in ogni câs par no plui di 150 euros, che lis fameis a àn vût par iscrivi i lôr fruts a di une dissipline sportive vie pal an scolastic 2015-2016. Il benefici al è stât assegnât a fameis cuntune certificazion Isee che no passe i 12 mil euros. Dai beneficiaris 190 a son frutis e fantatis e 289 fruts o fantats tra i 5 e i 17 agns. La dissipline sportive là che si àn vudis plui domandis e je chê dal balon (166). I vegnin daûr arts marziâls (51), volley (51), basket (49), natazion (42) e vie indenant. A pene publicade la determine cu lis graduatoriis, si proviodarà a visâ sei lis fameis ametudis al contribût, sei chês che no lu àn vût. I bêçs a rivaran sul cont bancjari o postâl specificât te domande ai 31 di Zenâr par cui che al à paiade la iscrizion tun colp sôl e ai 30 di Jugn par chei che invezit a son daûr a paiâle a ratis.