146 mil euros di invistî sul traspuart public locâl

Vot corsis par Godie lis domeniis, eliminazion des bariduris architetonichis in cinc ponts de linie 1, continuazion dal servizi di bus navete pal cjastiel e cualchi lavôr par miorâ lis struturis di acet in stazion. A son lis azions là che il Comun di Udin al vûl doprâ i ultins fonts a disposizion pal traspuart public locâl che a rivin di sparagns intal Plan urban de mobilitât e di fonts propris dal Comun. Si fevele in dut di plui o mancul 146 mil euros. I intervents a saran metût in vore in acuardi cu la SAF a pene che e rivarà la autorizazion de Provincie di Udin, ent responsabil pal traspuart public locâl. In particolâr, par rispuindi ai vueits causâts dai tais al traspuart public locâl cu la ultime finanziarie regjonâl, si à chê di ativâ une linie gnove che e servissi la aree di Godie e di Beivars, il simitieri di Padier, Cjavriis l’ospedâl e vie Culugne. Vot lis corsiis che a interessaran dutis lis domeniis (cun partence di Godie a 9, 9.45, 10.30, 11.15, 15, 15.45, 16.30 e 17.15) almancul fin a Jugn cuant che e rivarà insom la fase di sperimentazion, che e covente ancje par viodi la rispueste dade dai citadins a chest gnûf servizi.