Vie libare al plan par limitâ l’incuinament atmosferic

La Zonte comunâl e à fat bon, daûr di ce che e domande la gnove normative regjonâl, il Plan di Azion Comunâl par limitâ l’incuinament atmosferic. Trê lis liniis di fonde di intervent: diminuzion des temperaduris intai edificis, controi su la cualitât dai lens di brusâ, limitazions ae circolazion dai veicui plui vieris. Par chel che al rivuarde che ultin pont, lis limitazions a interessaran – di 4 dopodimisdì a vot di sere (16.00 – 20.00) inte aree de citât dentri dal anel dai viâi de circonvalazion – i veicui a benzine euro 1 e 2, diesel 0, 1, 2 e 3, e i ciclomotôrs e i motoveicui 0 e 1. Tes Zonis a Trafic Limitât e tes areis pedonâls il bloc de circolazion si slargje ancje te fasse orarie 14.00 – 16.00 pai mieçs diesel pal traspuart di marcjanziis omologâts euro 0, 1, 2 e 3. I residents te aree interessade dal proviodiment no saran tocjâts des limitazions. Il plan comunâl al sarà in vore dai 15 di Otubar ai 31 di Març di ogni an, fûr che te dade jenfri i 7 di Dicembar e i 7 di Zenâr. Pal riscjaldament dai edificis no si à di passâ i 20 grâts, ma cuant che i nivei di Pm10 a van disore dal soiâr permetût lis temperaduris a varan di jessi sbassadis di 2 grâts. Par chel che al rivuarde i lens di brusâ, i furnidôrs a varan di dimostrâ ai clients tal moment de consegne che la percentuâl di umiditât no passe il 20%. Ducj i detais dal plan si puedin cjatâ sul sît dal Comun.