Uficis comunâi di viâl Duodo, evacuazion precauzionâl

A front de segnalazion di vibrazions intal edifici di viâl Duodo là che a son logâts un pôcs di uficis dai servizis sociâi dal Comun di Udin vuê si à decidût di evacuâ in maniere cautelative la struture. La reson des vibrazions par cumò e reste discognossude, ancje se une prime verifiche no à mostrât nissun probleme static o lesions di sorte. Lis vibrazions a podaressin jessi l’efiet di un cantîr li dongje, ma par sigurece il Comun al à dât incaric ai tecnics di viodi cualis che a son lis causis. I controi a son in program lunis e se dut al ves di risultâ a bon, i uficis a tornaran a vierzi in maniere regolâr cun martars.