Vandalisim te Loze dal Lionel, si cressaran i controi

“La polizie locâl e je daûr a visionâ lis imagjins regjistradis des telecjamaris e se a saran cjatâts fûr i vandai si proviodarà daurman par che a sedin clamâts a paiâ i coscj che il Comun, e duncje i citadins, al à su lis spalis par netâ”. Chestis lis peraulis a bote cjalde dal sindic Furio Honsell dopo che une gnove scrite e je saltade fûr su la façade de Loze dal Lionel. Magari cussì no, no je la prime volte che al sucêt e ogni tot la Aministrazion comunâl si ricjate a vê di paiâ miâts di euros par comedâ i dams lassâts dai vandai. Di cumò indenant, al zonte Honsell, si lavorarà ancjemò di plui su la prevenzion, no dome par pidimentâ lis azions di cui che al sghiribice sui monuments de citât, ma ancje par controlâ ducj chei che si incjampin alì de Loze e le tratin come se e fos une scovacere.