Presentât vuê il progjet “Far sport – Oltre la crisi”

Il Comun al darà un contribût aes fameis cuntun redit bas pes spesis vudis par iscrivi i fîs a di une dissipline sportive. Al è ce che si propon il progjet “Far sport – Oltre la crisi”, presentât vuê a palaç D’Aronco cu la partecipazion dal sindic Furio Honsell, de assessore pal sport, pe educazion e pai stîi di vite Raffaella Basana, dal president dal CONI regjonâl Giorgio Brandolin, dal president de Casse di sparagn dal Friûl – Vignesie Julie Giuseppe Morandini, e dal rapresentant di AMGA Energia & Servizi Riccardo Finelli. Par mieç di cheste iniziative la Aministrazion comunâl e darà un contribût economic dal 50% e fin a di un massim di 150 euros par cuvierzi lis spesis che lis fameis a varan par iscrivi i fîs a di une dissipline sportive dilunc vie dal an scolastic 2015-2016. Il benefici, che al sarà dât fûr fintremai che no saran finîts i fonts a disposizion, al è indreçât a fruts e fantacins tra i 5 e i 17 agns che a vegnin di fameis cuntune certificazion Isee che no passe i 12 mil euros. Lis domandis a varan di jessi presentadis dai 15 di Setembar ai 31 di Otubar daûr des modalitâts spiegadis sul sît www.comune.udine.it .