Morositât “cence colpe”, si pues fâ domande di contribût

Il Comun al vise che cun vuê, alì dal Centri polifunzionâl di vie Micesio, si invie la racuelte des domandis di contribût par cui che, cence colpe, nol à podût paiâ l’afit. Cun di fat, la Zonte comunâl e à fate buine la publicazion dal bant di concors pai titolârs di un contrat di afit che a àn ricevût un avîs di sfrat par morositât. In plui di jessi residents in comun di Udin, par acedi ai contribûts al covente vê un Isee che nol passe i 26 mil euros, vê la residence tal alozament in cuistion di almancul un an e vê une morositât “cence colpe”, o sei consecuence direte dal vê pierdût il lavôr o dal cjatâsi in casse integrazion. La domande, il bant e dutis lis informazions che a coventin si lis cjate sul sît internet www.comune.udine.it, alì dal sportel Sissu di vie Micesio, tes circoscrizions e tai uficis de anagrafe di vie Stringher. Lis domandis a àn di jessi presentadis dentri dai 30 di Setembar alì dal Centri polifunzionâl di vie Micesio, 31 (dal lunis al vinars di matine cun orari 8.45 – 12.15, il lunis ancje cun orari 15.15 – 16.45), alì dal Protocol gjenerâl dal Comun (vie Lionello, 1) o pûr cun racomandade o pueste eletroniche certificade.