Scree ai 9 di Lui pe mostre “Oasis Photocontest” 2015

Ai 9 di Lui, a cuatri dopodimisdì (16.00), si scree alì de ex glesie di S. Francesc la mostre dedicade ae gnove edizion di “Oasis Photocontest”, un dai concors fotografics plui impuartants a nivel european dedicât ae nature. E je cussì la pussibilitât di viodi uns otante fotografiis in formât grant tra lis plui bielis de edizion 2015 dal concors. A insiorâ la iniziative, sabide ai 11 di Lui a nûf mancul un cuart di sere (20.45), dopo de presentazion uficiâl de mostre curade dal assessôr comunâl pe culture Federico Pirone e dal diretôr dal Museu Furlan di Storie Naturâl Giuseppe Muscio, e je in program une serie di proiezions sul sagrât de glesie che a àn par titul “Dagli Appennini alle Alpi” e che a son curadis di Ivo Pecile e Sandra Tubaro di “Sentieri Natura”. La mostre e reste vierte la joibe e il vinars cun orari 16.00 – 19.30, la sabide e la domenie cun orari 10.00 – 13.00 e 16.00 – 19.00. Par informazions si pues clamâ il 0432 584711.