Gnot Blancje, plui spazis pai comerciants

Pe novesime edizion de Gnot Blancje, in program sabide ai 4 di Lui, il Comun di Udin al ponte a inviâ un gnûf model di organizazion dal event che si poi suntune colaborazion plui strente e suntune partecipazion plui ative de bande dai esercizis comerciâi che, pe prime volte, a podaran lâ fûr des buteghis par proponi lis lôr ativitâts doprant spazis metûts a disposizion sore nuie de Aministrazion comunâl. I comerciants a àn timp fintremai i 12 di Jugn par presentâ lis lôr domandis cui modui che ur son za stâts zirâts o che a puedin cjatâ sul sît Internet dal Comun alì de direzion www.comune.udine.it . La Aministrazion comunâl e darà il so contribût al event ancje cuntun program di ufiertis culturâls, cun percors burocratics autorizatîfs plui sclagns e cu la deroghe orarie pal rumôr slungjade fin dôs di gnot.