Il cors sul codiç de strade si tornarà a fâ ancje tal 2015

A son stâts tancj i citadins che a àn frecuentât il cors sul codiç de strade inmaneât de polizie locâl dal Comun di Udin che si è a pene sierât. La iniziative e previodeve sedis apontaments par fâ cognossi ai citadins lis regulis de strade, ma soredut par informâju sui compuartaments responsabii di doprâ cuant che si va in machine, in bici o ancje a pît. Ae fin dal cors al è stât ancje dât fûr un cuistionari che al à mostrât un nivel alt di gradiment pe iniziative de bande dai partecipants. A front di chest risultât positîf, si à decidût che i incuintris a saran tornâts a proponi ancje chest an che al ven.