Ultin apontament cu la Setemane Europeane de Mobilitât

Al è fissât par domenie ai 28 di Setembar l’ultin apontament dal calendari metût adun dal Comun di Udin pe Setemane Europeane de Mobilitât, la iniziative che dal 2002 a invide lis citâts europeanis a inmaneâ azions e events in materie di mobilitât sostignibile. Il program, metût in vore dal Tavolo a pedali, in colaborazion cun BicitUdine e Uispe Anpi, di fat si siere cuntune pedalade organizade dal Anpi tai lûcs de memorie citadine. L’apontament al è par domenie aes 9 a matine in place Libertât, di dulà che a tacarà une visite in biciclete compagnade di leturis e dramatizazions vuidadis dal professôr Flavio Fabbroni, autôr dal libri “I luoghi della Memoria e della Resistenza nella città di Udine”. Par cui che al à voie di partecipâ bisugne prenotâsi dentri di joibe ai 25 contatant l’Anpi al numar 0432.504813 o ae direzion di pueste eletroniche anpiudine@gmail.com