Fieste de Sierade ae Cjase des Feminis

A sîs mês de scree des Cjase des Feminis al è timp par un moment di fieste, ocasion ancje par fâ un prin belanç des ativitât puartadis indenant fin cumò. Sabide ai 27 di Setembar a tacâ des 5 dopomisdì inte sede di Vie Pradaman 21 si davuelzarà la Fieste de Sierade, une serade cun musiche, teatri, culture. “O vin pensât che al jere il moment just par une fieste” e à dit la assessore pes Pari Oportunitâts Cinzia Del Torre, che sabide a vierzarà l’event cui salûts di benvignût. Al sarâ po dopo spazi pe musiche cul grup feminin rock Poppin’ Candy e pal teatri par cure di Arianna Zani; aes 6 e 40, invezit, al sarâ il moment de Biblioteche di Agata. In sieradure a sarâ la esibizion dal côr feminin multietnic La Tela. Par informazions al è pussibil mandâ un messaç ae direzion di pueste eletroniche pariopportunita@comune.udine.it