Presentade vuê la XX edizion di Friuli Doc

E je stade presentade vuê sot misdì in maniere uficiâl la vincjesime edizion di Friuli Doc che e varà tant che “testimonial” il portîr dal Udin, Simone Scuffet. A screâ la manifestazion, joibe ai 11 di Setembar a cinc e mieze dopodimisdì (17.30) in place Libertà, in plui di Scuffet a saran ancje i aministradôrs che intai ultins vincj agns a àn rapresentât la citât intes edizions stadis di Friuli Doc. Une novitât impuartante e je rapresentade des oportunitâts ufiertis de Rêt cuntun gnûf sît internet (www.friuli-doc.it), un canâl Youtube, une pagjine Facebook e une aplicazion interative par smartphone e tablet che si pues discjariâ za cun vuê. Par cheste edizion di Friuli Doc si à riviodût ancje la “mape dai savôrs” cul ERSA che pe prime volte e puarte i siei stands in Marcjât Vieri, intant che Confartesanât, in plui che in vie Vittorio Veneto, e rivarà ancje in place S. Jacum. Confermâts invezit, dome cun cualchi justament, i sîts di chei altris esposidôrs. Te edizion di chest an a tornin ancje un pocjis des specialitâts furlanis tant che i cais di Trivignan, la raze di Cjons, lis cjastinis di Magnan, la coce di Bagnarie e il cierf di Seorgnan. In dut però a son plui di cent i stands che a jentrin inte mape de manifestazion. Confermâts ancje i apontaments cu la “cusine spetacul” in cort Morpurgo. Friuli Doc nol è dome mangjâ e bevi, ma ancje musiche e spetacul cun passe un centenâr di apontaments e plui di cinccent artiscj, cence dismenteâ lis ativitâts di pueste pai fruts. Te edizion di chest an la lenghe furlane e varà plui pês dentri de manifestazion tant che imprest di comunicazion e tant che protagoniste di iniziativis, un tant in gracie de colaborazion tra il sportel linguistic dal Comun, la Agjenzie Regjonâl pe Lenghe Furlane, Radio Onde Furlane, la Serling e il IAL. Pe ocasion FriulAlberghi, Associazione Albergatori Udinesi e il Comun a proponin ancje un pacut turistic speciâl, batiât “Viaggio in Friuli DOC”.