Garantît l’acès al stadi Friûl pe partide sul Empoli

Comun, prefeture, cuesture e Udinese Calcio a àn concuardât une soluzion provisorie che e permetarà al Udin di zuiâ denant dal so public la prime gare di campionât in program domenie ai 31 di Avost cuintri dal Empoli. Tai prossims dîs la societât di balon furlane e fasarà meti jù une schirie di bariduris mobilis par protezi la aree dai uficis dal implant sportîf. “Il stadi nol à mai vût nissun probleme di acessibilitât – al à spiegât il vicesindic, Carlo Giacomello – la uniche criticitât si riferive ae gjestion de sigurece te aree dai uficis là che si metaran jù lis bariduris daûr des indicazions de cuesture”. Pe seconde partide in cjase, in calendari ai 21 di Setembar cuintri dal Napoli, si proviodarà invezit cuntune soluzion che e restarà in vore fintremai la fin dai lavôrs intal stadi. “Di chi ai 21 di Setembar al è dut il timp par cjatâ un sisteme plui stabil dacuardi cu la cuesture – al zonte Giacomello – za la setemane che e ven si cjatarìn par frontâ la cuistion”.