Parc machinis ex Frigo viert dopo de fin dai lavôrs

“Il parc machinis alì dal ex Frigo al sarà tornât a vierzi a pene che a rivaran insom i lavôrs par meti in sigurece e recuperâ la aree”. Cheste la rispueste dal sindic di Udin, Furio Honsell, denant des critichis che a son rivadis pe sierade de aree di soste libare che si veve ad ôr di vie Sabbadini e che e je stade decidude de Aministrazion comunâl par garantî la sigurece dal complès. La intenzion, duncje, e je chê di tornâ a vierzi a pene che l’intervent al sarà rivât insom dome che, al zonte Honsell, denant dai problemis leâts ai vincui dal pat di stabilitât, vuê come vuê al è dificil cognossi la date de fin dai lavôrs.