Sieradis avostanis par cierts servizis comunâi

Il Comun di Udin al vise che dai 11 ai 14 di Avost i uficis des Circoscrizions a saran sierâts al public. Cun lunis ai 18 di Avost i sportei a tornaran a vierzi cui oraris estîfs, ven a dî il lunis di matine tra dîs e une (10.00 – 13.00), il martars e il miercus di matine tra nûf e misdì (9.00 – 12.00), e la joibe dopodimisdì tra trê e sîs (15.00 – 18.00).

Te setemane de Madone di Avost al reste sierât ancje l’Informagiovani di viâl Ungheria, intant che i servizis comunâi pai zovins di plaçâl Valle del But a sierin par dôs setemanis par tornâ a vierzi cui 25 di Avost (segretarie cun orari 17.00 – 20.00; salis provis musicâls 18.00 – 22.00). Il pont di incuintri zovanîl di viâl Forze Armate, invezit, al reste viert in maniere normâl ducj i dopodimisdîs, tra cuatri e siet (16.00 – 19.00), fûr che la zornade dai 15 di Avost.