Tra Lui e Avost diviers cantîrs su la viabilitât citadine

Cu la setemane che e ven si inviaran gnûfs intervents di manutenzion dilunc des stradis di Udin. Plui in detai si trate de asfaltadure di une trate di viâl delle Ferriere, de sostituzion des tubaduris in viâl Tricesimo, de metude in sigurece de crosere di vie Selvuzzis e lavôrs sul vert urban dongje dal sorepàs di viâl Palmanova. Par permeti di davuelzi in sigurece i lavôrs e je previodude la sierade di ciertis stradis e diviersis deviazions. Il cantîr su viâl delle Ferriere al sarà in vore dai 28 di Lui al prin di Avost e al puartarà la sierade de strade inte trate jenfri vie Tullio e la crosere cun vie De Rubeis. I lavôrs su viâl Tricesimo a tacaran invezit cui 21 di Lui. Une prime part dal intervent al interessarà la trate jenfri plaçâl Chiavris e il civic 33. Ta cheste fase i veicui che a van bande Nord a puedin lâ dilunc a fâ viâl Tricesimo, intant che chei che a jentrin in citât a saran deviâts su vie Maestri del Lavoro e vie Feletto. Te seconde fase, che e varès di tacâ tor dai 17 di Avost, i lavôrs a cjaparan dentri la trate jenfri il civic 33 e vie Monte Vodice. Ta chest câs, dut il trafic al sarà deviât su vie Feletto, vie Tavagnacco, taronde Ciceri e taronde Terminal Nord. Tal câs dal intervent alì dal sorepàs di viâl Palmanova, i lavôrs si centraran te fasse orarie che e va di vot e mieze di matine a siet sot sere (8.30 – 19.00). Dai 21 ai 26 di Lui i lavôrs a interessin la rampe di vie Pradamano e il trafic al sarà indreçât su vie di Brazzà. Dai 28 di Lui al prin di Avost, la rampe interessade e sarà chê che e mene in vie della Cernaia cul consei di cjapâ il sotpàs di plaçâl D’Annunzio. Dai 4 ai 8 di Avost si lavorarà dilunc de rampe in jessude de citât e il trafic al sarà deviât di une bande su vie di Brazzà, e di chê altre su vie della Cernaia. Dai 11 ai 14 di Avost i mieçs che a van in centri citât a saran indreçâts su vie Melegnano, vie Marsala, viâl Europa Unita e plaçâl D’Annunzio, intant che i veicui che a van fûr de citât a saran deviâts sul sotpàs di plaçâl D’Annunzio.