Nissun aument pe Imu e sconts pe Tari

Nissun aument par Imu, tarifis a domande individuâl e adizionâl Irpef, cuote limitade pe Tasi, e sconts su la bolete des scovacis. A son chescj i elements principâi de manovre tributarie decidude de Zonte comunâl inte riunion dai 15 di Mai e presentadis vuê al public, in spiete dal vie libare definitîf dal Consei comunâl. In mert ae Imu no si varan novitâts rispiet al an passât, fûr che pes facilitazions previodudis pai incubadôrs di imprese, pes aziendis che a gjoldin dal bonus ricercje e des start up inovativis, o sei chês aziendis metudis sù di mancul di doi agns e che a àn tant che obietîf il svilup, la produzion e la comercializazion di prodots o di servizis inovatîfs. Par chel che al inten la Tasi – la tarife decidude dal guvier talian intal 2014 par compensâ lis jentradis in mancul che a divignin de eliminazion de Imu su la prime cjase – si partìs di une cuote minime dal 1 par mil che, intal câs di Udin, e sarà puartade al 2,5 par mil e metude in vore dome su lis primis cjasis. A restin fûr de misure i citadins cun Isee sot dai 8.270 euros. Su la Tari, o sei la tasse su lis scovacis che e cjape il puest de Tares, la Aministrazion comunâl e à previodût un tai stimât tor dal 4% pes utencis domestichis e plui o mancul dal 6% pes utencis dal cumierç, dai servizis e de industrie. Il sindic Furio Honsell al à ancje zontât che, a pene che al sarà pront il belanç gnûf, si varà un cuadri plui clâr ancje sui contribûts di dâ aes fameis in cundizions di disasi par judâlis a paiâ chescj tribûts.