Viertis lis preiscrizions ai servizis di mense, pre e post acet

A son viertis lis preiscrizions ai servizis di pre e post acet e di ristorazion scolastiche pal an 2014-2015. La procedure e permetarà aes fameis di davuelzi lis operazions di preiscrizion ai cinc servizis dâts fûr dal Comun: la mense, il pre acet, il post acet, il doposcuele curt cun mense e il doposcuele lunc. Si tacarà cui gjenitôrs dai fruts che a gjoldevin za chest an dai servizis scolastics. Ta chescj dîs lis fameis interessadis a son daûr a ricevi i modui che a coventin, ma che si puedin cjatâ ancje sul sît www.comune.udine.it. Par confermâ la iscrizion ancje pal prossim an scolastic i gjenitôrs a varan di jemplâ il modul pe domande di amission e puartâlu dentri dai 31 di Mai intai uficis di viâl Ungheria 15, o pûr mandâlue vie pueste eletroniche (iscrizionimensadoposcuola@comune.udine.it) o vie fax al 0432 271792. La seconde butade de campagne e sarà dedicade invezit aes gnovis iscrizions. Ta chest câs, dentri dai 31 di Mai, lis fameis interessadis a varan di prenotâ vie internet, simpri sul sît www.comune.udine.it , un apontament personalizât par presentâ la domande di prime amission ai servizis che a interessin. Par chei utents che no àn la pussibilitât di acedi a internet, si pues doprâ il servizis inormatic alì dal ufici comunâl pai servizis educatîfs e sportîfs (viert il lunis jenfri 8.30 – 16.30, il martars tra 8.30 e 12.30 e 14.00 – 16.00, il miercus, la joibe e il vinars jenfri 8.30 – 12.30) logât in viâl Ungheria 15. I apontaments a saran fissâts tra i 3 di Jugn e i 11 di Lui. Pes fameis cun plui fîs iscrits si podarà regolâ la situazion intun apontament unic. Par altris informazions si pues indreçâsi al sportel unic pes prestazions educativis e ristorazion di viâl Ungheria 15 (tel. 0432 271902/576 o fax 0432 271725/729).