In Mai intervents su la crosere di vie Selvuzzis

Lûs a intermitence su dutis lis cuatris viis di acès ae crosere e ralentadôrs stradâi par obleâ a cori di mancul. A son lis misuris decidudis de Zonte comunâl inte riunion dai 15 di Avrîl par meti in sigurece la crosere di vie Selvuzzis dulà che a sucedin dispès incidents. I intervents a saran fats vie pal mês di Mai, intune cu la gnove asfaltadure di vie Selvuzzis. La propueste elaborade dai uficis tecnics dal Comun, une volte sintûts i vigjii dal fûc e il conseîr di cuartîr, e va daûr di un model za sperimentât inaltrò. Al è il câs de crosere di Baldassarie Basse cun vie S. Ulderico, là che cheste soluzion e à permetût di azerâ i incidents.