Campagne par limitâ la cressite dai colomps

La aministrazion comunâl e à inviât une campagne par limitâ la cressite dai colomps. Ca di pôc, in dodis ponts de citât, si tacarà a meti fûr un prodot antifecondatôf svilupât di pueste pai colomps, che nol à altris consecuencis par chescj uciei e nol à efiets pal om, par chei altris animâi e pal ambient. Chel istès si invide la citadinance a evitâ di tocjâlu. La sô distribuzion e vignarà fate par cinc dîs a setemane fin al mês di Otubar. Par che la misure e vedi efiets si invide però la popolazion a no dâ di mangjâ ai uciei e a no butâ vie e bandonâ mangjative. No si à po di dismenteâ che, daûr de normative comunâl, cui che i da di mangjâ ai uciei al riscje une sanzion di 100 euros.