Udin al centri dal progjet URBACT II pes citâts sanis

Udin tant che citât model de Union Europeane par servizis, ativitâts e iniziativis pe popolazion indenant cui agns. Cun di fat, intes prossimis setemanis inte capitâl furlane a son in program dibatiments e incuintris cun rapresentants de Organizazion Mondiâl de Sanitât, cun aministradôrs e tecnics di altris citâts europeanis, cun organizazions e associazions dal nestri teritori, par ilustrâ lis pratichis di ecelence dai servizis pe tierce e pe cuarte etât svilupadis de aministrazion comunâl pe promozion di un invecjament san e atîf. La iniziative si insuaze tal program european URBACT II, finanziât cun 400 mil euros, che al à l’obietîf di meti in rêt diviersis citâts europeanis par condividi buinis pratichis sul teme dal invecjament in salût par mieç dal svilup di strategjiis integradis. Intune cun Udin, citât a cjâf dal progjet, a partecipin ancje la capitâl scozese Edimburc, lis inglesis Brighton e Hove, la lituane Klaipeda e la francese Grand Poitiers. Intai incuintris in program a tacâ de setemane che e ven, Udin al varà la pussibilitât di presentâ lis buinis pratichis svilupadis de citât dentri de rêt Citâts Sanis de Organizazion Mondiâl de Sanitât e in particolâr dentri dal grup strent di citâts metût sù intal 2004 dal Ufici regjonâl pe Europe de OMS cul obietîf di progjetâ intervents par miorâ la cualitât de vite des personis plui indenant cui agns, creâ ambients e rêts di supuart, tornâ a organizâ i servizis par rispuindi miôr aes dibisugnis de popolazion anziane.