Indenant i intervents des scuadris comunâls pal brut timp

Ancje cheste setemane a van indenant i lavôrs par meti in sest lis stradis cu lis scuadris comunâls in vore massime là che a son stâts segnalâts dams causâts des ploiis che a àn interessât Udin intes ultimis oris. I intervents di vuê a àn interessât in particolâr vie Martignacco, vie Val Aupa, vie Daniele Moro, il sotpàs di vie Selvuzzis, la taronde in Cjavrîs e chê di vie Gonars. Tes zornadis stadis invezit a jerin stâts une vincjine i ponts de viabilitât citadine che a vevin domandât lavôrs. Cun vuê intes scuadris di manutenzion stradâl a son jentrâts in vore ancje i prins trê lavoradôrs di utilitât sociâl dal 2014. “Fintremai che al larà indenant a plovi cussì dispès e cussì a fuart – al à spiegât il sindic, Furio Honsell – no si puedin fâ intervents radicâi, che a àn bisugne che si gjavi vie l’asfalt e che si imbunissi il teren sot vie, ma si pues dome lavorâ dì par dì par jemplâ lis busis che a saltin fûr”.