Un milion di euros par intervents su la viabilitât

25 intervents su la viabilitât citadine a son pronts a partî par un cost totâl di sù par jù 1 milion di euros. Ju à decidûts la Zonte comunâl inte riunion di îr. Pe plui part dai câs si trate di lavôrs progjetâts intal 2012 e pronts a partî a pene apaltâts, ma fers pai vincui fissâts dal pat di stabilitât. Il Comun al intervignarà cun intervents in dutis lis Circoscrizions citadinis. Te Prime si intervignarà in viâl delle Ferriere, inte Seconde su dut viâl Venezia, intes viis Ferrari, S. Rocco, Bonini e Milano. I intervents inte Tierce Circoscrizion a rivuardaran vie Sbaiz e vie Valeggio. Inte Cuarte Circoscrizion i lavôrs a interessaran vie Magenta e vie Lupieri, intant che inte Cuinte si intervignarà su lis viis Veneto, Selvuzzis e Lavariano. Lavôrs ancje inte Seste Circoscrizion su lis viis Campoformido, Zugliano, S. Pietro. Inte Setime i cantîrs a interessaran lis viis Faedis, Pieri, Feletto, Emilia e Romagna. A chescj lavôrs si zonte ancje la sistemazion de viabilitât inte zone dai Riçs, intal plaçâl de stazion, suntune trate di vie Boccaccio e in Cjavrîs.