44 puescj in plui par Udinebike

Al cres il servizi di bici publiche (bike sharing) a Udin. A son cuatri lis gnovis postazions metudis in citât de aministrazion comunâl cuntun aument de ufierte di 44 puescj. Il servizi al è stât ativât intal 2009 e cumò a son sù par jù 500 lis cjartis ativadis, il 35% di chestis a Udin, un altri 35% intal rest de provincie e il 30% fûr de provincie. I ponts gnûfs dulà che si pues cjoli a nauli lis bicicletis metudis a disposizion dal Comun a son dongje dal palaç de Regjon, inte zone dal teatri gnûf, alì dal teatri Palamostre e intal plaçâl dal ospedâl. Pal servizi a son stâts spindûts 100 mil euros. O ricuardìn che si pues circolâ sore nuie la prime miezore, cun 0,30 euros te seconde miezore, cuntun euro la seconde ore e cuntun euro e mieç lis oris seguitivis.