PAC gnûf, cui 7 di Zenâr limitazions pai veicui

Il Comun al vise che cui 7 di Zenâr al jentrarà in vore il gnûf Plan di Azion Comunâl par limitâ l’incuinament atmosferic. “Il Plan – al spieghe l’assessôr pal ambient, Enrico Pizza – al va daûr di une logjiche gnove, no chê des targhis alternis cuant che l’incuinament al è za, ma chê de prevenzion par mieç di un bloc continuatîf”. Plui in detai, ce previodial il Plan? Pe circolazion, la misure principâl e interesse i veicui a benzine euro 0 e 1, diesel 0, 1, 2 e 3, ciclomotôrs e motoveicui 0 e 1 che, dai 15 di Otubar ai 31 di Març, no podaran circolâ inte fasse orarie di cuatri dopomisdì a vot di sere inte aree cjapade dentri dal anel dai viâi de citât. La misure no vâl par cui che al è a stâ dentri di cheste aree, pai mieçs publics, par chei doprâts di disabii e par chei doprâts di personâl medic par resons di urgjence. Te aree dentri des Zonis a Trafic Limitât e di chês pedonâls il bloc pai automieçs par traspuartâ marcjanziis euro 0, 1,2 e 3 al cjape dentri ancje la fasse orarie tra dôs e cuatri dopomisdì. Par chel che al rivuarde invezit il riscjaldament dai edificis, la temperadure massime no varà di passâ i 20 grâts e, in câs di superament dai limits di Pm10, e varà di sbassâsi a 18. No son cjapâts dentri di cheste limitazion i edificis cun cualificazion energjetiche di categorie B o plui alte, ospedâi, clinichis, cjasis di cure, scuelis e alozaments là che a vivin personis che a patissin di malatiis cronichis. Il Plan al previôt ancje che cui che al vent lens par brusâ al à di garantî al client une percentuâl di umiditât juste, intant che cui che al à in cjase spolerts, stuis o fogolârs al à di proviodi a tignî controlâts camins e napis.