In Dicembar autoparcs vierts sore nuie sabide e domenie

Lis domeniis e il dopomisdì des sabidis di Dicembar i parcs machine in struture a saran disponibii sore nuie, intant che la societât Ssm e proviodarà a dâ fûr aes buteghis dal centri 30 mil volantins par informâ i clients des promozions di Nadâl. E je la strategjie metude adun dal Comun, adun cu la Ssm e cu la Confcumierç, par dâi un sburt al cumierç intal centri di Udin. I parcs machine Magrini, Tribunâl, Andreuzzi, Caccia, Venerio e Moretti a saran duncje disponibii sore nuie lis sabidis, di 3 dopomisdì fin a orari di sierâ, e lis domeniis, di 8 di buinore a 9 di sere, a tacâ dai 7 di Dicembar e par dut il mês. Si trate di 2 mil puescj machine disponibii cence paiâ che si zontin ai 4 mil disponibii sore nuie ad ôr des stradis e ai 4 mil a paiament. Di segnalâ che pai fruts fin ai 12 agns e je ancje la pussibilitât di viazâ a gratis par dut il mês sui trens de linie Udin – Cividât.