Sante Catarine, limitazions al trafic in Zardin Grant

La citât si prepare ae fiere di Sante Catarine che si davuelzarà di vinars ai 22 a domenie ai 24 di Novembar. Des 8 e mieze di lunis ai 18 fintremai lis 6 sot sere di martars ai 26 al sarà proibît il passaç su dute place Primo Maggio (Zardin Grant) e su vie Liruti. Ta cheste aree, dut câs, al sarà permetût il passaç ai veicui cun autorizazion pal acès e pe jessude di slarc delle Grazie, là che si varà un dopli sens di circolazion. I lavôrs par montâ i barachins che a daran vite ae fiere e i ultins alaçaments eletrics, invezit, a tacaran joibe ai 21. Cemût che al sucêt ogni an in ocasion de fieste a saran metûts fûr dai cartei par visâ des deviazions al trafic in slarc delle Grazie, plaçâl Del Din, vie Gemona, viâl Trieste, vie Caneva, androne Agricola e vie Giovanni da Udine.